شعراء تفخر عنيزة بقاماتهم

[فتى العوشزية]

بسم الله الرحمن الرحيم
السلام عليكم ورحمة الله وبركاته
هذه وقفه في شعراء محافظة عنيزة التي أنتم اليها في الواقع وأحببت أن أنشر بعض القصائد ولفته الى شعراء عنيزة وأتمنى من الاعضاء الكرام مشاركتي في الموضوع ......

هذه قصيده للشاعر علي بن رشيد الخياط قصيده حربيه جميله في معانيها ..
قال البطل الشاعر : علي بن رشيد الخيّـاط ( راعي البندق )يفتخر بأهل عنيزة ورجالها . سنة 1270هـ


يادارنا لا ترهبي يومك سعيد = حنا حمـاة الدار ..وشـبّ اشـعالها

هذي عنيـزة ما نبيعة با لزهيد = لافرّعـنّ البيض نحمى جالهـــا

دونك ودون الغيد مخضــر الجريد= نروي من الضد الحريب سلالها

يا مـا ذبحنا دون غضّــاتٍ تميد= جنا يز ترمى ولا احد شـالها

لو جبت عناز وشمّـر و ا لرشيد = ونجـدٍ جميعه دقّــها وجــلالها

جبته وخلّـيته كما حلـقة حديد = شرق وجنوب وغربـها وشمـالـها

الدار دونه لا بــةٍ تحمى الطريد = صعب على كل العدا منا لها

كم سـابق يـوم اللقا جريه يزيد = عاد اتنا ضربه وضرب امثـالـها

تا طا حديد وفوق راكبها حديـد = تـوطّـته مركوبته بنــعـالـها

عيّـنت وين الجـرو تكفى لا تحـيد = قل لي تعـشّـته الضّـرا وعـيالها

ياشيخ ياللي ما طلع مثلك وليد = لا رفّـعـنّ الخيل شهب اذيـالـها

الشيخ مثلك مـا يحايد من بعـيد = يارد على دارٍ بـكو نـزا لها

لي بندق ترمي الـلّـحم لوهـو بعيد = ما وقّـفت با لسوق مع د لاّ لها

خماسي رصاصهْ سـتّـة اشبارٍ تـزيـد = ملح الجريف محـيـّلٍ يعبــا لهـا

ربعي هل الطولات والباس الشديـد = خـطرٍ عـزايـمهـا تهدّ جبالهـا

اولا د علي هم عما عين الضديــد = عقّــا لـها يوم الوغى جهّـالهـا

وان كان تبغى الحكم فالراي السديد = ادحم على الديرة وحضّـب جا لـها

قطع النخل مهـوب عيب والوقيد = العيب با للي ما يتــمّ اقــوا لـهـا

الله يجـازي كل جـبّـار عنـيد = منّـا ومنـكم يوم عرض اعـمـا لها









شاعر عنيزة , بل شاعر نجد الكبير / محمد بن عبدالله القاضي ,رحمه الله , وقصيدته الذائعة الصّيت في " وصف القهوة " وطريقة إعدادها ..


يامـن لقلبٍ كل ماالـتمّ الاشفاق=من عام الاول به دواكيك وخفوق

يجاهدجنودٍ في سـواهيج الاطراق=و يكشف له أسرارٍ كتمهابصندوق- 1

إلى عنّ له تذكار الأحباب واشتاق=باله وطف بـخاطره طاري الشوق

قربت له من غاية البن مـالاق=بالكف نـاقيهاعن العذف منسوق -2

إحمس ثلاث ٍ يانديمي على ساق=ريحه على جمر الغضايفضح السوق -3

حذراك و النيةوبالك و الإحـراق=واصحى تـصير بحمسةالبن مطفوق -4

الى اصفرّ لونه ثم بشّت بالاعراق=وصارت كما الياقوت يطرب له الموق

وعطـّت بريح ٍفـاضح ٍفاخر ٍفـاق=لا عنبر ٍريحه بالا نفاس منشـوق

دقـه بنـجر ٍ يسمعه كـل مشتاق=راع الهـوى يطرب ليادق بخفوق

واحشه بدلـة مـولع ٍ كنها ساق=بـلورة ٍ مـنصوبة ٍ تـقل غرنوق

خلّـه تفـوح وراعي الكيف يشتاق=الى طفح له جوهرٍِ صح له لوق

أصغراقموره كالـزمرد با لأشعاق=وكبارها الطافح كما صافي الموق-5

زلّـه على وضحا بها خـمسة ارناق=هيل ٍ و مسمار ٍ بالأسباب مسحوق-6

مع زعفرانٍ والشمطري الى انساق=ريحه مع العنبرعلىالطاق مطبوق

إلـى اجتمع هـذا وهـذا بتـيفاق=فـصبه كفيت العوق عن كل مخلوق

بفنجال صين ٍ صافي عنه الارماق=تغـضي وكـرسيه غـدان ٍلمعشوق -7

الى صب فابصر جوهره تقل شبراق=رنق ٍ تصور بالـحمامة على الطوق

شكل غَـرَاالفنجال صبغه كما راق=دمّ الـغزال الى امـّـزع منه معـلوق- 8

خمر ٍ الى منه تـساقى بالارياق=وعليه من ماء صافي الورد مـذلوق-9

راعيه كنه شارب ٍ ريق ترياق=كاس الطرب واسرور من ذاق له ذوق -10

يحتاج من خمرالسكارى الى فاق=طـفل ٍ يشف شفاه والعـنق مفـهوق

عبث ٍ يعيل ابـحُبة ٍ منه ما ماق=وهـو يباهي باهـي البدر بشــعوق -11

في وجنتيه الى غنج بارق ٍ حاق=عـجل ٍ رفيفه بالطـها الغـرق بطـبوق -12

سحر ٍكتب من حبرعينيه باوراق=خـديه صـادين ٍ و نـونين من فـوق -13

كن العرق بخـدودها حـصّ ارناق=نـثر عـلى صفحات بلـورة الشوق -14

إلى تبسم شع و أشـرق بالآفاق=نور ٍ يفـوق البـدر سحار منـطــوق

والعنق كن المسك والورس بـراق=مامشخص ٍ في صدره الشاخ مدفوق- 15

يـمشي برفق ٍ خايف ٍ مدمج الساق=يفصم حـجول ٍ هزه الثقل من فوق

الى صفت لك ساعة ٍ و أنت مشتاق=فاقطف زهر مالاق و العمر ملحـوق

فالى حضر ماقلت عندي فالارزاق=بيدي كـريم ٍ كافـل كل مخلــوق

والله لو يمــشي شقاق ٍ بالأسواق=مـن الملاء مايمسط الخمس مخلوق

هـذا و صلوا عـد ما ناض بـراق=أو ماشكى الفر قا شفيق ٍ لـمشفوق

يحتاج من خمرالسكارى الى فاق=طـفل ٍ يشف شفاه والعـنق مفـهوق

عبث ٍ يعيل ابـحُبة ٍ منه ما ماق=وهـو يباهي باهـي البدر بشــعوق -11

في وجنتيه الى غنج بارق ٍ حاق=عـجل ٍ رفيفه بالطـها الغـرق بطـبوق

على النبي مـا زج زاج ٍ با لأوراق=و آلـه و صحبه عد ماسيق مـسيوق

1/السواهيج ..من سهجة: دهاه , سحقه ,و يريد بالصندوق :الصدر الكتوم لللأسرار .
2/العذف : النفاية
3/السوق: الشارع
4/الحمس : تحميص القهوة - مطفوق : متسرّع .
5/ القمور : الحبب الناتج من غليان القهوة , شبّه صغار الحبب بقطع الزمرّد , وكبارها بآماق الحدق الصافيه .
6/ الارناق : الأصناف , - المسمار : القرنفل , - الشمطري : نوع من الطيوب , - الطاق مطبوق : أي الضعف مضاعف
7/ الغدان : تخوت الثياب
8/ الشبراق : المختلط الألوان كقوس قزح , وقد أجاد في تشبيهه بلون طوق الحمامة المتعدد الألوان الممتزجة .
9/ مذلوق : مندفق .
10/ الترياق : الأفيون .
11/ الشعوق : اللمعان ,- ماق : طغى وتكبّر .
12/ حاق : صادق المطر , - الطّها : المزن , الغرْق : كثير المطر
13/ شبه الخدّين بصادين , والحواجب بنونين .
14/ الحصّ : اللؤلؤ .
15/ المشخص : الذهب , - الشاخ : الفضة , أي ماء ذهب على فضة .


وهذه اخرى



ناح الحمام ويبيح القلب مكتوم = ما حن في حاف الحشاش المستهامي

ما ادري طرب يالورق وأصرت محروم = أو بك على فرقا وليفك هيامي

يالورق ما يخفى على الله معلوم = لو هي خفي على جميع الأنامي

يالورق ما صابتك الأيام بهموم = مثلي ولا أنت بمغروم في غرامي


حتى تنوج وترفع النوح واتهوم = تبدي شكايا مبهمات الفهامي

خل النياحه للذات بات مهموم = مثلي ويجاوب ساجعات الهمامي

وإلا انت يا ورق على رأس مزموم = ما سمعت نوح امعقلات ظوامي

مستأنس في بارد الظل واتحوم = تشهر وتشرف عاليات العدامي

ما صادفك صرف النيا عاد بكلوم = ولا ذقت ليعات الهوا والمرامي

أنا كثير النوح يا الورق والوم = من لا نوح ومعتني في ملامي

مجروح قلبي داء ودواء مفهوم = مخفيه عن نقال سدي وكامي

حذاري من لا يخشىقول منهوم = ينشا بعلم ما نمته النوامي

يا لورق من صايت لياليك ملزوم = يجفا نظر عينيه لذيذ المنامي

يالله خذ عني مراسيل وارقوم = مختومه في طنها لي سلامي

عد النبات وعد ما خط مرسوم = واعداد ما هل المطر من غمامي

وعد ما يطلب من الله مظلوم = وعد ما بأولاد حام وسامي

بتحيه من صافي الود معدوم = منه الصبر وكنه فقيد العمامي

ابديه بالترحيب وبالشوق مختوم = ختم الغوالي غاليات المسامي

للجادل اللي جاد له منه مفهوم = رد الخبر عنه بليا وهامي

انه يسل عني على غير موهوم = بيني وبينه ما تهاي ولامي

يا من هو اشفاي من اشفاه مطموم = ضيم الدهر شيت عريض اللمامي

عزي لمن ركن بالصبر منه مهدوم = عزاه على واللي لمثلي دوامي

سهر يقاس زوذ الأفكار وهموم = من زوده ليعات تفت العضامي

على سام جنس للغناير محتوم= بشربه لو يكترث عليه الزحامي

ومن رام مهنه الوصل بات محروم = يجدي ولا يبدي ويخفي الكلامي

خوف الحسود أو واش يبدي اعلوم = بيدي مساوي خافيات العلامي

يا من وشا بين المحبين بسهوم = حي ولا خص الحكي بالتهامي

اقصر فهذي دعوة امحال ويشوم = منها تجي ما يعرضه وحامي

تمت وصلي الله على خير مكروم = أحمد شفيع الخلق طه التهامي

[فتى العوشزية]

وننتقل الى الشاعر حمد بن عبدالرحمن المغيولي من فحول الشعراء المعاصرين ولد 1353هـ في مدينة الشعر ( مدينة عنيزة ) وتميز بالذكاء والنبوغ الذي ظهر في قصائده ذوات الافكار الجديده الخاصه بحمد المغيولي فقط .
احب الصحراء واثرت في شاعريته وقصائده التي اصبحت جميلة المعاني جزلة الالفاظ .
يعتبر (ابو دحيم ) كما يحب عشاقه ان ينادوه من فرسان المحاوره المعدودين وكان يعتبر من مراكز القوة ومن اميز شعراء المحاورة في المملكة وقد لعب محاورات مع كبار الشعراء ( علي ابو ماجد - علي القري - عبدالعزيز البادي - محمد بن ثعلي - احمد الناصر - مطلق الثبيتي مستور العصيمي - شليويح المطيري ) وبالذات مع الشاعر عبدالعزيز البادي حيث اثريا ساحة الرد في عنيزة فترة طويله .
انتقل من عنيزة للعمل في الرياض ( وزارة الدفاع) ومارس الاعمال الحرة في مجال حفر الآبار واستقر به المقام في مدينة تبوك لظروف العمل هناك وتوفي فيها بتاريخ 7/5/ 1416هـ ودفن هناك رحمه الله
اشتهر شعره كثيرا وتناقله الرواه وليس له ديوان مطبوع الا ان هناك اجتهادات من بعض المعجبين الذين حاولوا جمع قصائده في مذكرة كما فعل الاخوان في دار التراث في عنيزة وكذلك نشر له بعض القصائد في ديوان شعراء عنيزة الشعبيون الجزء الثاني ونتمنى ان يجمع شعره في ديوان خاص به فشعره يعتبر ثروه شعريه قل ان تجد مثلها في هذا الزمن
وقد ا خترت لكم من قصائده قصيدة ( تعزيت ) التي يقول فيها :

تعزيت اهوم الصبر والصبر ماطيقه=عيوني من الفرقى شقاها يلاحقها
الايعيوني من طوى الهم والضيقه=الى اقبل سواد الليل هلت غوارقها
اهوجس ودمع العين جرح طواريقه=كما تجرح الوديان جانب مضايقها
انا انتل قلبي وانصرم من معاليقه=جزع وانمزع والروح شبت حرايقها
الاياوجودي وجد من قل توفيقه=غدى له ذهيب جرته مايعتقها
على جاهل كن الكواكب عشاريقه=تهاوى القمر والشمس من فوق عاتقها
عليه اشقر منقوض تسبح دواليقه=على نهده المركوز والنهد خانقها
الاواهني من صام وافطر على ريقه=شهر من زمانه عندها مايفارقها
شفى علتي شربة هنى من لواهيقه=اطفي بها كبد ضماها مخرقها
عسى مزنة من عصر تكشف بواريقه=عليها يحيل الطير من قو بارقها
تحدر على مزن هوايه مشاريقه=جنوب الشعيب وشرقها الجال فارقها
تجي غبها الريضان تضحك زماليقه=حمار وبياض زاهيه جل خالقها
مداهيل عنقا يشكي الضيم عشيقه=يسومل وروحه عاصف الحب طارقها
مع الشاعر عبدالله بن دويرج (رحمه الله ) ...

الاياعيني اللي ماتلد بكل الازوالي=ولاتشبح وتفرح لين ترمق زول مظنونه
الايالوعتي يافجعتي ياكبر غربالي=على غرو الى سلهم ذحاح الموت بعيونه
ذبحني بالهوى حبه وسم الجسم من حالي=قضى لي لاجزاه الله وزاد الجاش بطعونه
اثر كل العذارى مابهن من يرحم الحالي=الى شفت المولع بالهوى ماهمب ياوونه
الاياعاذلي لو قلت لي خلن على فالي=انا والنفس عند مخضب الكفين مرهونه
على ماراد يلعب بي وتل القلب ماوالي=كما تل الرشا طفق على المسنا يحدونه
انا بالشمس وانت ياوليف الروح بظلالي=خطا ماخفت من سبح له الرعاد بمزونه
الاياعين خرسا ماكره في نايف الجالي=انا وياك صرنا بالمثل ليلى ومجنونه
عليك العي كما تلعي طيور الليل عزالي=تفجع بالبكا قلبي عليه وباح مكنونه
اناياكيف ابصبر والغضي يطري على بالي=الاياويل من نفسه بعنق الريم مقرونه
انا باللي مضى داله ولاابكي فرقة الغالي=ولكن ياعذابي حالوا اهل الترف من دونه
عسى من سبب الفرقاوحاس بفقدي الغالي=عليل كلما زاد المرض دلوا يكوونه
وهذه أيضاً قصيدة للشاعرنا حمد المغيولي (رحمه الله وأسكنه جناته وجميع موتى المسلمين أجمعين ) :

يقول الشاعر اللي ما يصور شنوه وما صار "=" أجيب اللي يفيد المستمع من عدل الأمثالي
أنا بختار والرجال باللي يعجبه يختار "=" ولاني منعدل يا هل المعرفة عن هوا بالي
الا ياتل قلبي تلسيمٍ تله الحفار "=" على بيرٍ صفاها يلطمه جالٍ على جالي
إلى من المكينة صاحب الصنعة عطاها النار "=" حداها اللي حداني والهوا للروح قتالي
على اللي تل مقاويمة ثلاث أشبار "=" على نهد زما فوق التريبة تقل فنجالي
حداها دونها حظ الندم وسط النهار إجهار "=" مشيت بيوم لوم ماتبي حالي ولا فالي
ألا ياحيلة الله كل مادار الفلك وإندار "=" تعرضلي نهارٍ يبعد الغالي عن الغالي
رمان بدار واللي شوفته موت وحيات بدار "=" احسب إن البطى يجل الغلى عن كل رجالي
حبيبٍ ما قصر دوني قدم رجله عن المسيار "=" يواصلني وانا محتاجه ساعٍ ومرسالي
وأنا اسريله اذا نامة عيون الحسد والهذار "=" أخاف اهل الحسد يدرون باحواله واحوالي
حبيب مايطاوعبي كلام الواشي الثرثار "=" وانا مااصخيه كان اصخي نهار البعث باعمالي
نفوز بصحبةٍ من يوم حنا بالشباب اصغار "=" وكلٍ ما يطيع بصاحبة واشي وعذالي
والا يالله بسترك يا الهي وبسمك الستار "=" تلبسنا ثياب الستر يارحمن ياوالي
و هذه القصيدة للشاعر حمد المغيولي ( رحمه الله ) يقول فيها :

على مايشوق لخاطري ينطق لساني=يعبر لساني لكن الوقت ضاهدني
عشقت الهوى واشقان يوم الله اشقاني=احسبه على حمل الموده يساعدني
رماني هوى قلبي وسمن وعناني= وانا دون هذا كهرب الحب صايدني
مع الصاحب اللي في ضحى العيد وافاني=يذود الزعامه كن وده يساندني
رميت السلام وفاتني تقل ماوحاني=وهو يسمعن لاشك قصده يكايدني
الايابعد حالي ومالي وحياني=بلاش التغلي مد كفك وعايدني
ترى الكل غير الله رب القدر فاني=ولالك صلاح في حياتي تزهدني
الى جيت حادين الوحم حرق عطشاني=على مبسم غر ثناياه وردني
طرف ساعة شانك يوافق على شاني=اشاهدك وانت ياعيوني تشاهدني
يطفي لهيب شب بالجوف نيراني=ترى الكبد حرقه والمنيه تهددني
من العام قلبي من تغليك وجعاني=وغيرك من الخلان ماهوب فايدني
الايازريف الطول يانجل الاعياني=على حبك اللي غامرن لاتحاسدني
حرام ان سلبت الروح وايتمت بزراني=عساها بحظك كان صممت تبعدني
تذكر زمان فات مامداك تنساني=ليا كنت بالله للصداقه تعاهدني
نقضت العهود وبعت ولفي بهجراني=وكثر الدلع ماهوب يبعد ولايدني
الشاعر حمد المغيولي - شاعر عنيزة الاول والذي لن يسد مكانه احد -

اهدي هذه القصيده التي ايضا اعتقد انها غير متداوله يقول فيها رحمه الله :
الاياونة ونيتها من خاطر مفجوع=تهضم بالبكا والعين دمعه فوق الاوجاني
على اللي لاجزاه الله تعرض لي بلا منفوع=يبين اسهر وانا قبله من اللواعات سهراني
الاياهل الهوى من حين طراد الهوى ملقوع=يحصد البين مع طول المدى والقلب تعباني
انا والله ماسيرت قصدي ياعميلي طوع=ولكن مقصدي بمشاهدك ياخرس الاعياني
علامك ياثمر قلبي تلوعن بالهوى لي لوع=تعرض لي خطى ويلك من الله يوم تدهاني
زريف الطول مسلوب العواتق عودها مربوع=الاماهبلك ياللي عن هوى المجمول تنهاني
انا وياك يابدر الدجا عنا القلم مرفوع=ولكن لاتغلى تمحنن والقلب تعباني
سقى الله من سقاني من ثمان مزها قرطوع=برى عن خاطري واطفى لهيب الكبد واحياني
صلاة الله عدد ماهل وبل بارقه لاموع=على المختار ماغرد حمام فوق الاغصاني
وهذه أيضاً قصيدة للشاعر حمد المغيولي (رحمه الله)...

الاياعيوني ما يفيد النظر والشوف "=" تكافي وكفي لاتراعين ياعيوني
تكافي كفاك مكايد الجاد للغضرزوف "=" ابو وجنتٍ فيها شرى الموت مقروني
انا اشوف شوفك واتمنى وانامشفوف "=" من اللي سلب عقلي وأشقان بضنوني
غزالٍ يداني خيطوته بين امان وخوف "=" يوطي قدم رجله على القاع بالهوني
لاحظني بعينٍ كن فيها نمش وسيوف "=" وقع ما بكفي واختلف وانصفق لوني
تبي ذبحتي ياريم وادي سكاكا الجوف "=" حسيبي عليك مصرف الخلق والكوني
تعرض غريبٍ مازحٍ يم ابن رفروف "=" ورا دار قاره يقلب الذيب من دوني
الاياعذابي منك ياضامي السلجوف "=" شبكني هواك وبيح الحب مكنوني
الايازريف الطول انا اطلبك بالمعروف "=" بعد عونت الله منك انا باطلب العوني
دخيلك تلبي دعوةٍ من ثلاث احروف "=" طرف ساعةٍ نفرح بها وانت ممنوني
اريح ضميرٍ بالهوا مولعٍ مكلوف "=" من الله خلقني بالغنادير مفتوني
وساذكر واحده من مساجلات الشاعرين الكبيرين حمد المغيولي وعلي ابو ماجد وهي اول مره يتحاور المغيولي مع ابو ماجد الذي شجعه على ان يحاوره لانه اي المغيولي تلميذ ابو ماجد ولم اجد غيرها بينهما وكانوا في الرياض ورئيسهم فرنسي وفي الاجازة لعبوا هذه المحاوره حيث
قال ابو ماجد:

ياسلام الله سلام تقل ماهوب متساوي = ردة من هاجس اللي يفتح الباب ويصـــكه
العبوا واللعب مايامر عليه فرينساوي = والذهين اللي يعرف الدرب لو من غير سكه
المغيولي:

ياهلا من هاجس ماله مثل قلبك مناوي = قالها اللي مايجي في خاطره ريب وشكه
ان بغيت العب واشاقلك المعاني بالعراوي = خل رادوك الى غنى على موجات مكه
ابو ماجد :

والله اني عن جميع اللي تهوجس به غناوي = بس باطراف الشفايا واللسان قراد حكه
مصبح مابي خلاف وممسي تقل متداوي = مادري قلبي مريض وبالعزم والحال ركه
المغيولي :

لاتحسب اني عن اللي شاعف خاطرك غاوي = كل عظم مايغرن حد راسه من مفكه
مير انا اغمض وافتح مثل ماقال الهواوي = الشعيب ان سال سيله مايجنب عن مدكه
ابو ماجد :

تنكر اني في زمان فات لي عزم وهقاوي = يوم بارودي ليا وريتها الطاير تشكه
والموده كد كلاني من مكاويها مكاوي = دوك جسمي من غرامي نقشته نقشة بلكه
المغيولي :

المولع لو كثر شيبه ولافته البلاوي = لو بغى يترك طريقه جاه هاجوس يدكه
لو حلفت برب طه سامك العرش السماوي = مانطيعك مانطيعك لاتحسب اني مهكه
وبعد هذه المحاوره اعطى ابو ماجد للمغيولي الضوء الاخضر ليسلك طريق المحاوره مع كبار الشعراء
وهذه المحاوره الشعرية بين الشاعرين الكبيرين حمد المغيولي والشاعر عبدالعزيز البادي:
قال حمد:

هب الهوا غربي هبوبه سمومي ياحر شوب الشوب "=" من شاعر الحله عقب ما سرا الليل يطري له القافي
ياهني ياحربي تسمع علومي ولعب على المسحوب "=" ليلك سرا كله بليا محاصيل يالله ياكافي
قال عبدالعزيز:

خل المثل يربي وهات العلومي يامقدم الماجوب "=" يامبهر الدله لمسرا الجماميل نور القمر طافي
تبي تخاطربي وتنهب هدومي ولاعلي ذنوب "=" ماجيت في زله على فتنت الفيل اصفي مع الصافي
قال حمد:

ليت الجمل دربي لما اقضي لزومي يمشي على المطلوب "=" الدرب انا ادله واعرف المقابيل والنور ينشافي
منتب تعذربي تعرف السلومي ناجح بالات جروب "=" اللي شكا العله فقد قوة الحيل ومن شافي ماعافي
قال عبدالعزيز:

اشفق على الشرب لاشك محاكومي درب الخطر مقضوب "=" قلبي على خله يهوب الهاوابيل وامشي وانا حافي
تبي تدوربي مسالك ثلومي مير الخبر محجوب "=" كلش على حله ويلقى المقابيل من حكم الاشرافي
قال حمد:

ليتك تفكربي وتجلي همومي ياناعم النبنوب "=" يادفع الزله عن الضيع والميل تشفين ياشافي
اللي يغرربي عليه محرومي واصبحت انا مصيوب "=" ليته على المله مع الحط والشيل يوفي ويستافي
وهذه ايضاً قصيده للشاعر حمد المغيولي (رحمه الله):

مديمناك سلم خل عندك مروه "=" حل همٍ بقلبي زاد عنف وضراوه
الهوا والمودة من زمان النبوه "=" ياغزالٍ خذا فوق الشهادة علاوه
كل ماغبت عني قمت اسوهج وبوه "=" وأتمنى الجهل وأيام عصر البداوه
يوم انا ماهويت وعني الحب توه "=" دال هالبال سالي بين صح وغباوه
انت ياللي سلبت العقل واقفلت جوه "=" ليه ترضا علي المسخرة والقساوه
ضمني في حنانك حق صحبه وخوه "=" لاتشنه على اللي مصخرلك عداوه
لانطحني دلع يمشي عسى العز نوه "=" صابني بالقوايم برد عزم ورخاوه
صدفه الحظ يوم انه رماني بضوه "=" قلت للي جرحت الروح بالوصل داوه
لاتمس العواطف عمد من باب قوه "=" وانت عندك مثل ما فيك ذوق وطراوه
وان بغيت القسا ماجاعلى البال سوه "=" ياحلاوه على عينك وكلك حلاوه
يطيب لي ان اتطرق لعلم من اعلام الشعر الشعبي في عنيزة وهو الشاعر الكبير علي ابراهيم القري بن عيد( رحمه الله )
ولد رحمه الله في عنيزة عام 1338هـومات والده وهو صغير تعلم القراءة والكتابة في عنيزة ثم انتقل الى مكة المكرمه وتخرج من مدرسة الضباط وتقلب في عدد من الوظائف العسكريه ثم انتقل الى الجمارك ثم تقاعد وعاش بقية ايامه في جده وتوفي فيها رحمه الله
يتميز شعره بانه سهل جدا حتى انك تسمع للشعر وتحسبه كلام مثل

يابو فهد ارسل لنا كروة البيت =بالبنك والا عن طريق السبيعي
ابيه قبل لايدخل الماء على الزيت=والا الثقه بي منك شي طبيعي
من قصائده اختار لكم هذه القصيده التي ارسلها لاحد اصدقائه

اشهد انك يابو عبدالله وفي=مانسيت ولاتناسيت الصحيب
لو بغت شمس الصداقه تختفي=ترجعه للشرق من عقب المغيب
وبالقصيد اقهرك بمطوع نفي=شاعر جيد وبالمنبر خطيب
ذا وانا من خطكم زاد شرفي=صرت اغر اللاش واعظم من كليب
والرجال شهور تافي وتهفي=واجد المخطي وهو وده يصيب
المراد الله يسمح ويعفي=كل شي اليوم بالله والنصيب
لم يطبع له ديوان خاص به الا ان له قصائد نشرت في بعض الكتب منها شعراء عنيزة
رحمه الله

[فتى العوشزية]

من قصائد الشاعر عبدالله العليوي شفاه الله

ليتك تعيش


ليتك تعيش بواقع الحب لو يوم=وإلا تشوف لوضعنا ذا نهايه
بالحب انا ياغاية النفس مظلوم=محتاج يالغالي لعطف ورعايه
لى السهر ولعاذلى لذة النوم=من شان حبك ماسهرنا هوايه
ماصابني من نظرة العين مقسوم=أسير حبك لاتحطم رجايه
ماكل عين تجرح القلب بسهوم=وماكل من يرمي يجيد الرمايه
أنشهدانى منك يازين محروم=معك ابتديت وفى هواك النهايه
فات الاوان ولاتزيدباللوم=الصبر بيدي يوم قلبي معايه
بالاسم والمعنى وماقلت مفهوم=ياشمس عمري يابدر في سمايه


اروع عقد من قصائد الشاعر عبد الله العليوي

لولا غيابك ياهوى النفس ماضاق "="صدري ولا بانت بنظراتي الشوق
لي قلب مثلك واسهر الليل واشتاق"="غيرك فلا والله تمنيت مخلوق
بيني وبينك خطوه الرجل تنعاق"="حسبي على اللي صار بيننا عوق
اجرح وقلبي لك على الدوم ينساق "="حتى الجروح الي تجي منك له ذوق
كمل جمالك والي العرش بخلاق "=" رمشك جرحني ساقني للهوى سوق
كيف انتهت ذيك المشاوير بفراق "="والعام الاول كانت احلامنا فوق



هذا الشاعر الكبير
عزيز البادي
رحمه الله
شاعر من شعار الفيحاء(عنيزه)
وكان شاعر محاوره من الطراز الاول
سريع البديهه ..... ابياته قويه .....
والاهم من هذا كله
كان الله يرحمه ماله مقاضيب
اقصد ان كثير من شعار المحاوره له عيوب ومماسك
لكن عزيز البادي الله يعفو عنه كان ظابط عمره
وله محاورات مع الكثير من الشعار
ولعب مع الكثير من الشعار
حمد المغيولي
علي الماجد
خلف ابن هذال
شليويح المطيري
وغيرهم الكثير
محاوره صارت بعنيزه في احتفال
كان بالملعبه الشاعر الكبير (حمد المغيولي)رحمه الله
وكان خصمه احد اكبر شعار المحاوره واقواهم
وهو
(شلاح المطيري)
وكان خصمه حمد المغيولي
الصراحه حمد المغيولي زعل شلاح المطيري
انقهر شلاح
وفي اخر الليل
خلاص قربوا على النهايه
جاء المطيري وجاب له طاروق يسمى (معوشر)
والطاروق ذا مايجيبه الا الي ورط لانه صعب
وخصوصا اخر الليل
يقول المطيري

حنا نبا نقدح الضو بزنادي =فان كان جيناك رد الخبر عنا
ياليل يالي كما ليلة العيدي =والي بكربه ياما خلص دونه
انت ياذيب لاتقنب لذيب
خلو حمد يحتمي واجب الديره=فان كان له عادة(ن)لايخليها
الديره الي لنا فوقها هيبه=ناخذعليها الضريبه بالاموالي
قبل يحماكم الحاكم سعود


الاخوان الي مافهموا معنى الابيات
يقول المطيري
(خلو حمد يحتمي واجب الديره)
يقول قولو لحمد المغيولي يدفع الزكاة او الاتاوه وهي (الجزيه)
مدري بس من هك عليه وقال له
الصفوف شالت الابيات
والجماهير تحتري المغيولي يرد-
لكن الله يهديه ابودحيم منبعص مزاجه
كل الحضور ينتظرون رد ابودحيم
بتلت الصفوف تشيل ابيات المطيري
المطيري يوم شاف المغيولي ورط انبسط
وابتسم ابتسامة النصر

لكن مادروا الا هاك الي ينزل من المدرجات حقة الملعب(المحاوره بملعب)
ونحر المكرفون

وقال

ذا الليل قدامك الخصم ابن بادي=يعطيك بالحق مردود ومثنا
سموك بالهك شيخ النماريدي=تعال اوريك شيختك ش لونه
المطيري رمى فيه النصيب
حنا ترانا نجدد لك السيره=ناخذ معك بالمعاني ونعطيها
قلي من ذير الوارده عن مراقيبه=هذاك ياعنك مهوب رجالي
ومحتمي له على عصر الجدود



هذه المحاوره بين حمد المغيولي وعبدالعزيز البادي رحمهما الله


حمد:

ادبح اللي واللي يعتزي مالقيته =يوم شلنا عليه الشيل صارت عوافي
والله اني من اول غافل مانويته=مير شفت الحذر بالعين والشوف كافي

عبدالعزيز:

كان في منتهى الدرب الطويل احتريته=مثل ماقال قدام الركاب النصافي
يما انا حقي اللي وارد لي وفيته=ظابط للعيار زنادها والمشافي

حمد:

يوم ابيح كنيني طاف بي ماقويته=عوج الايام مني بينت كل خافي
انت مني عداك اللوم حقي قضيته=ليت الايام تافي مع سرى كل وافي

عبدالعزيز:

ودي انك تخلى العلم حيه وميته =لب لي وافتهم ماقول لك يالسنافي
وانت تفتح لنا المعنى وانا مااشتهيته=كل شي تعدى عن طراته يعافي

حمد:

والله اني فلا اسلك مع طريق جفيته=شرت والشور منكم لي قرار ومطافي
افتح الدرب وانته فاهم ماغويته=وان تعافيت انا مثلك تراي متعافي

عبدالعزيز:

واهني من بروحي ياحميد فديته=بارد في سموم القيظ وشتاه دافي
تجذبه صدفة الايام لو مارميته=كودي اخذ معه سجات والستر ضافي

حمد:

تبكي العين من فرقى حبيب بكيته=لاتبكي عيونن تزعج الدمع صافي
وين ذاك الخضار اللي خلي رعيته=تقطفون النوايع قبل حل القطافي

عبدالعزيز:

وانت في خرمسي الليل ترقى بهيته=ماتكلفت مثلي بالحتيفه وحافي
واتمنى ولكن ماحصل ماهقيته=تقضب ايدي على اللي ممتحني كتافي

حمد:

انت ترجي وانا اللي في رجى الله رجيته=مالفانا من اللي شطر البيت لافي
ماحصل لي من الله ياعزيز رضيته=وانت جرتك ماطمت عليها السوافي

عبدالعزيز:

منكر ياعقيد المعركه مامشيته=مايخبرك بالسيرات مثل الصحافي
انت تكتب وانا اللي يكتبونه محيته=خابر وش ورى الميته وابرجي واخافي

حمد:

شلهبن الليالي قلعن طنب بيت=مابقى الا العذوق وفات وقت الخرافي
انت قاري وانا اللي ترسمونه قريته=صرمت عشبة الريضان شهب الهيافي


هذه محاورة للشاعر حمد المغيولي والشاعر شليويح المطيري عندما قال شليويح
ان المغيولي تخفى عن ملاقاتي بينما كان المغيولي متواجد في ساجر مع الحفار


ابتدى المغيولي بقوله:
سلام من غريم مايدس الراس حدر الليل=حضر واللي تمنى حضرتي ماجذ من دونه
ظهر لك نجم يالنجم الحداري مثل نجم سهيل=فلكن لاتتيه الدرب مع ناس يتيهونه
شليويح:
هلا بك عد ماحن الرعد والسيل عقب السيل=غريم يوم جاني هيضتني تلت لحونه
ليا منك حضرت الملعبه خلك تعدل الميل=لعلك ياحمد منتب ورى ظني ولادونه
حمد:
تمنيت الزمول اللي تشيل وتحتمل للشيل=هنيك يالعيون اللي على الطاري تمنونه
ربيع القلب لاصاح المصيح وسط عج الخيل=ومن غره حصانه فالمزاعم لاتحنونه
شليويح:
ترى من ضيع الجره يبا يمشي على الدربيل=ومن يمشي على الجره يشوف الدرب بعيونه
تمنيتك كما انك يذكرونك في عظامك حيل=وشراب الحشايش مايطفي راس غليونه
حمد:
انا عيني مراتي ياخصيم ماتحف الكيل=فلكن الليالي بالخطا ماهيب مامونه
تمثنى الليل ياليل الثريا وش حصل للريل=عسى مابالمحرك ركبة ماهيب مازونه
شليويح:
طويل الماد مابيني وبينك واطلب التسهيل=واببدي لك علوم عن جميع الناس مكنونه
بعد وصل المحطه وقف البابور للتنزيل=الى منه مشى بالدرب زيته فوق زيتونه
حمد:
الا ياطيرنا ياللي تشكل هرجتك تشكيل=متى ياطير تعطون الخبر والا تودونه
اشوف الريل يوم انه مشى بين عليه الضيل=جديد العام والا هالسنه ماهو على لونه
شليويح:
ابعطيك الخبر من راس علمي ماندق التيل=لعلك ياوسيع العرف من راسي تحلونه
الى منه مشى البابور يقسم لك جبال هذيل=بعد توه تحرك ماوصل حده بطبلونه
حمد:
قريت الدرسعي والابجدي والريل غير الفيل=حليل السالفه سمع بها باللعب وشلونه
ترى الميته من الحب الحمر تسقط من الغربيل=ولايحتاج كل يجني الصافي بماعونه
شليويح:
انا الليله قبيلك يالقصيمي مابها تبديل=الين ان المطوع يصعد المنبر بحاجونه
اخذ حب مصفى منتبه لك واحد حلحيل=على ماقال راع السالفه سنه ومسنونه
حمد:
الاياليل ياليل جرى الوادي وشال الغيل=عمود الملعبه لو طال ليله لاتوطونه
سبحنا بالفرات العام وايضا سابح بالنيل=وانا مونس براسي حبة ماهيب مطحونه
شليويح:
ترى من ضيع الحجه لعمه يدفع البرطيل=وانا صافي مع الصافي ولي نيات ملعونه
انا عندي خبر راسك مشيب مابها تشكيل=الك عاده فلكن عادتك ماهيب مامونه
حمد
انا مانيب اكلف عاجز ماينطح التحمي=وانا مارضى عليك الميل كان الناس يرضونه
اشوف الحلق هرب واحسب ان النقص بالكرتيل=عقب ساعه حدا الخصمين منا تكلح سنونه
شليويح:
وبه دم خفيف وفيه دم يطلب التحليل=وانا ماني بعير لحملتك ياريس الشونه
ثلاث ليال لاشبيت لالمبه ولاقنديل=بعد سافر غريب الدار جيت تخلص ديونه
حمد:
دريت وجيت والحفله ليال كلبوهن حيل=وانا مانيب عنز تبحث السكين بقرونه
ترانا وان كربنا الحبل بان الجرح عقب الويل=وحدنا يظهر اللي حدر البارح بطاعونه
شليويح:
لبست البدله اللي من بلدها ماتبي تفصيل=ازرتها ثلاثه كل واحد فيه كيلونه
انا مانيب شاوي عليه تقرقع البرميل=توقع لين انك تعرف الحالي وليمونه


ابن بادي مع خلف بن هذال
هي :

بن بادي:
ياسلام الله سلام بردة مثنيه=عد ماينشا الخيال ويرزم الرعادي
ردة تطرب سموع اهل القلوب الحيه=له حلاوة ذوق بالمحدار والمسنادي
خلف:
مرحبا ترحيبة مني من احسن نيه=حشمة للحاضرين وحشمة بن بادي
انت تفهم للطروق وخطتك ممشيه=مثل ماسويتها قلل بملح الزادي
بن بادي:
الله اكبر ياخلف هذال وش هالجيه=مادري صدفه عليك او رابط ميعادي
عام الاول قصوا الجره مع المريه=مير عجات الهوى تخفى الاثر بالوادي
خلف:
الليالي تجمع شتات العرب بشويه=جيت رفت لها عيني وعرق فوادي
كان قصاص الدروب محضر مركيه=الجرر واجد ولاتبكي ذهيب غادي
بن بادي:
العلوم كثار والغالب مع الشرعيه=انت بزنادك وانا ابشعم بقدح زنادي
قالوا انك عام الاول رحت للبريه=انت وش جابك لجنة عاد بن شدادي
خلف:
ماكذبت ان الحساني يذهبن السيه=شب نارك واتتقد ويجي مية وقادي
انت حالم ماصدق حلمك جمعت بليه=مادرينا عن علوم قال عنها الرادي
بن بادي:
ياحليلك يالعلوم بخطة برحيه=كان هو شرف شهر شعبان عقب جمادي
ياجمل مادري وراه تحوشك الدوريه=وانت عن درب الحلال مجنب من غادي
خلف :
الشهور الها عدد وايامها مخفيه=كم تفيد وكم تصيد وحبلها منقادي
الجمل يسحب خطامه ماوراه دعيه=ماحذف زهبة شداده فالمحيط الهادي
بن بادي:
الشريب اللي شريبه فوق جال الطيه=مادري وشبه ترقب جية المدادي
والزماليق الضحى بالقايله مرعيه=لاصباح ولاهجاد يقعد الرقادي
خلف:
يحسب انه كاسب له خزنة منسيه=مادرى مفلس وتتله الابعادي
كان ياشمس الضحى وقتي طويل الفيه=مابقي للناس ظل وضاع شوف العادي
بن بادي:
انت لو زليت عندي زلتك مرفيه=لاتذكرت الجهام وقصة المجلادي
والله اني مارغبت الصبغة البنيه=خابر غيب الليالي فخها صيادي
خلف:
لاتذكرني زمان سطوته بيديه=صار فيها المسك والعنبر وعود الكادي
الجهل ينعم مع الشايب وله ماريه=كم حدا من ليلة سودا وقدمه حادي
بن بادي:
يوم سبلا والجهام وركضة الرجليه=وانت ذاك الحين لادله ولابرادي
كل راعي غي لو تنهاه يتبع غيه=مثل شن الريح في جسر على بغدادي
خلف:
ماكذبت انا قرينك والسنين رخيه=يوم سبلا وانت لاراحل ولاشدادي
لو مسكتك في زمان فات ذقت الكيه=بس فينا طبيعة مانروع الاجوادي
بن بادي :
خلها بكتابها ياصاحبي مطويه=فزعة اجدادك وهذي من عزوم اجدادي
يوم وقت ثليم وانت تروح للصينيه=كاسب عز وكرامه ماعقبت بلادي
خلف :
باني لك سور طين وقلعة مبنيه=والثعل لو حاص لابد الثعل ينصادي
انت قدمي قد رميت الثوب بالغدريه=قلت مافصل ياكود الكم ورزقي بادي
بن بادي :
حالف والله لااحزم البهم للجنيه=خابر سيرتك ياحميد ورى حمادي
الخديعه والخيانه ورثكم جديه=والحقايق بالمقاضى مير خلك هادي


ومما قال الشاعر حمد المغيولي في الغزل000000000

وجودي وجود اللى جذب ونته وإشتان=بعد ما وقع وافلت يد ينه عن الطاره
قلب موتره بالقيض في حومة النقيان=صميله وهو ضامي على الباب مطاره
فزع للهمل بالقايله والقدم حفيان=تعب و إنقلب يبكي على شوف سياره
عرض له حلال القوم طفق من القعدان=جفل ساع شافه يوم حضه طفت ناره
يي نقذهللعود والعجز والورعان=يدير الروابع والهواجيس محتاره
قعد با لخلا لا من صميل ولا حذ يان=صفق بيده اليمنى من الوجد بيساره
سجد ركعتين وسلم امره إلى الرحمن= كقى يا مكاقي والمقادير جباره
بعد مانصرم نصف الشهر جابوا الرعيان=خبر ميت بين الطعاميس والقاره
لقوا جثته هم اشعروا بالخبر سلمان=وقال إبعثوا يكشف على النفد طياره
انا صابنى مثله من الهاتك الفتان=طلبته بصلح وشنها امس الضحى غاره
انا وش حياتى كان ابصبر على ما جان=معك حق تلعبي لعبة الفرد با الشاره
زماني وانا اراعيك عن جملة الخلان=افوضك تاخذ جوهر القلب واسراره
عسى ربما ترحم وتعطف على الوجعان=على راحتك تسمح من الورد نواره
اطفى قواد تشتعل جوفه النيران=ولوحبه بين العشاريق وازراره
احلللكوادعي لك من الخالق الغقران=إلى انقذت روحي من شقا الحب واكداره

مرثية الشاعر حمد المغيولي في والده عبد الر حمن 00

عونى بحالي يا عرب لا تعذلوني=دعوني اكافح لوعة الكود با لهوني
دعوني اكا يز لوعة الحزن والاسى= واعرط على روس الاصابيع بسنوني
دعوني كفا كم لوعة الهم والندم= دعوني لو زاد الجزع لا تلوموني
دعوني على ما بي من الويل والعنا= يا موفقين الخير با للة خلوني
دعوني اودع شيخ اقفت رحا يلة= على خطة بيضا بها الخلق يمشون
دعوني اودع شيخ لا قى وديعة= لو اني على فرقاه ما نيب ممنوني
دعوني اودع من يذري قرابته= كم دوحة خضرا لها نشر وغصوني
دعوني اودع مكرم الضيف والخوي= فريد الطبايع ما يبى الهين الدوني
اودعك يا شيخ مجار من الخطا= عن العيب واللى ينقد الرجل مصيوني
دعوني عليه ابكي من الصبح للمسا=مع الليل حتى خيم السهر بعيوني
دعوني اعزي عزوه غاب عزهم=تربوا بعزه مير انا فيه عزوني
دعوني اعزى به ارامل وغيرهم=نوادر حرار توهم ما يطيروني
دعوني اعزي به شيوخ وعجايز=لهم غير طيب النفس واجب وقانوني
والله لو ان الروح بالمال تشترى= لسوق ما حوشت والرزق مضموني
فلا شك هذي ساعة العمر انتهت=امنت بك يا سامع صوت ذا النوني
امنت باللي ذى تصاريف قدرته= رب عمر ها لكون با لكا ف والنوني
لك الحل يا من حل با لدار وارتحل=عن الحي والحيان والدار والكوني
لك الحل يا اللى ما بعد عايش الردى= من الله خلق روحه لما مات مدفوني
لك الحل يا اللى ما زرب في عشيرته = بدا وانتهى ما قيه قالوا يقولوني
حكيم حليم من مباديه معتدل= عفيف نزيه النفس ما هو مشحوني
حليم حكيم مهذب فوق هقوته = والاجا وسيط بين خصمين يرضوني
وختامها بادعيك يا سامع الدعا=يا ناصر موسى على قوم فرعوني
تغفر لروح خيمت حدر رحمتك=يا معتني با لكون يا خير ما موني

[فتى العوشزية]

الشاعر الكبير عبدالعزيز بن ابراهيم السليم

الشاعر العاطفي والذي شال اهل الطرب
والطبول بعنيزة اجمل ماقال حيث يعتبر رحمه الله من كبار
المؤسسين لفرق عنيزة الشعبيه وشاعر هذه الفرق ينافس
قصائد بن لعبون حيث ان قصائده لها قابليه من حيث الشيلات
وهي من القوة بحيث تشد من يقراها قراءه فكيف اذا كانت
مع فرقة السامري بعنيزة
له رحمه الله قصائد كثيره وجميله اغلبها في الغزل


الايامحمد خاطري بالهوى محتار=زعوج الهوى يضرب شماله جنوبيه
اديره يمين ولايطيع الهوى يندار=ولاينعشن غير الهبوب اليمانيه
الا واوجودي وجد عود ثوى بالدار=كسير المعاره عقب كون البكيريه
جداه التضيم والندامه على ماصار=رماه الزمان وخلت المشي رجليه
صفق بالندامه مابقى في يده معشار=يدبر بحال ودبرة العبد مقضيه
على اللي يدير الكون في دبرته يختار=مدير الفلك وامر الامور السماويه
رجيته يعيد الصيد في منبت النوار=يمين الزباير عن مسيل الغزيليه
هوى خاطري ماحدبرق الدهو ويسار=اوده مودة والد صافي النيه
اهيم وضميري ينكشف ماعليه ستار=على اللي يقود الصيد عين الضياحيه
رميته بخمس مخطيات السهوم صغار=على صفقتي بالخمس لد النظر فيه
رماني بنجل يلحقن بالعدو الثار=على لدته ضيعت واوميت بيديه
تعاقب سهومه والهوى يبترم ماسار=على رقمة الخدين سحر الهواويه
ملكت العزا والصبر والمبتلى صبار=اغض النظر من غير كره ومحقريه
اعلل ضميري بالرجاء والله الستارواحسب لغب العيد ليل الحراميه
ليال المواصل والفرح يصبحن قصار=ليالي رجاهن يدني الحي من حيه
على منوتي ليتا لهوى خاطر عذار=يمر ويروح ولايداوم على الجيه
على منوتي ياليت بعض القلوب تعار=ادور ضمير ماشوى الحب دخليه


أُخرى للرائع عبدالعزيز السليم رحمه الله



سرى الليل والمشغول ما طاب له مسراه=الا يا عيوني تالي الليل سهرانه

أودعك ياليل سرى بالفرح ماحــــــــــلاه=ربيع القلوب اللي من العام ولهانه

أودعك ياليل سرى ينعشن طريـــــــــــاه =سرى والمولع بالهوى ما انقضى شانه

إلى قلت أبسلى عن هوى خاطري وأنساه =عرضني مسلي والهوى غاب شيطانــــه

أنا كيف أبسلى عن هوى اللي يجر خطاه =غزال تتريق بالهوى تقل سكرانـــــــــــــه

إلى أقبل يهيف إبمشية الويل عــــــــزاه =عذاب القلوب اللي من الولف ظميانــــــــه

وإلى قل رمشه ثم رد الهدب وأضفـــــــــــاه=أقول الحياة اللي بقت مالها خانــــــــــــــه

الا يا غزال تل قلبي معه وأغــــــــــــــــــداه =رعى بالفياض اللي من الوسم مليانـــــــه

تجزل بها اللي كل ما يشتهي ســـــــــواه =كمل بالجمال وسيد الزين سلطانـــــــــــــه

شقى خاطري يوم الشقا مدني فرقـــــاه =على طفلة من مشرع الزين رويانـــــــــــه

الا يا وجود وجد من ضامته دنيـــــــــــــــاه=رمته السهوم وطيّرت ريش جنحانــــــــه

على خشف ريم بالهوى فزّ من مربـــــاه =يرود القصيبي بين طلحة وغيرانــــــــــه








أكتفي بآخر قصيده أنقالت لعنيزة لأني طولتها معكم بصراحه ويوجد الكثير الكثير عن عنيزة من الشعر والأدب والتاريخ والعلوم والي تبي هذه قصيده عن عنيزة ماأدري من الي قالها لكن هي جميله بمعانيها


يكفي عنيزه

يكفي عنيزه جوها والتضاريس= وتكفيك شبت نارها من غضاها
وقت الشتاء فيها الغضا والمتاريس=بحد النفود من الغضا في ذراها
وبالصيف في عال الطعوس المجاليس=تنعشك جلسات النفود وهواها
وقت الآصيل إن داعبتها النسانيس=مثل السبايك يوم تصهر بماها
الديرة اللي شبهوها بباريس=تسوا فرنسا عندنا من غلاها
باريس نجد ونجد فوق المقاييس=نجد العذيه ما عشقنا سواها
فيها عن الماضي رواة وقواميس=ك من اديب وشاعر قد نصاها
ديرة رجال يكسبون النواميس=والدار طيب رجالها هو حلاها
اللي وجدته ترجمته الاحاسيس=ولإ عنيزة نجمة في سماها
يكفي عنيزة جوها والتضاريس =وتكفيك شبة نارها من غضاها







....................





منقول

[روح وردهـ]

يعطيك ألف عافيه

على القصائد الروعه

وفعلاً هؤلاء الشعراء نفخر بهم

[خشخوش]

يعطيك العافيه والله مجهود تشكر عليه يالغالي

[الوسمي]

ياسلام ياسلام وش هالابداع يابعدي وش هالجهد ماشاء الله عليك فعلاً ابدعت يالغالي

موضوع رائع جداً ومميز وما ادري كيف اشكرك عليه يالغالي

بيض الله وجهك وماقصرت ويعطيك العافيه على هالمجهود الكبير

الف الف شكر اخوي فتى العوشزية

[alzaeem]

يعطييييييييييييييك الف عاااااااااافية على النقل الراااااااائع والمميز

[فتى العوشزية]

روح وردهـ
ألف شكر لمرورك





خشخوش
ألف شكر لك على المرور الحلو





الوسمي
تسلم حبيب قلبي
وتستاهل باريس نجد أكثر
تسلملي يا عاشق عنيزة





الزعيم
يعطيك ألف عافيه يا بانوراما
ع المرور الروعه

[دثـار]

بارك الله فيك أخوي ومشكور على جهودك ويستاهلون كل الفخر

[فتى العوشزية]

يعطيك العافيه على المرور

[أنامن عنيزه]

تشكر على هالقصايد
لكن سمعت ان عيال المغيولي معيين تنشر قصايد ابوهم ولا ادري

[فتى العوشزية]

والله ما أدري يا أخوي


الموضوع منقول من منتدى آخر
وموضح هذا بنهاية الموضوع

ألف شكر لمرورك

[رجل لكل العصور]

صحيح شعراء لهم مكانه في عنيزه
وايضا لهم مكانه عندي انا لان حبهم ساكن بقلبي
لي و لعنيزه الفخر ان حــــــــمــــــــد المــــغــــــيـــولــي من شعارها ( رحمه الله )

شكرا اخوي على النقل تسلم ايديكـ

[فتى باريس نجد]

ما شاء الله تبارك الله موضوع راااائع

أشكرك بعنف عزيزي فتى العوشزية على هذا الجهد الجميل ..




تقبل مودتي

[فتى العوشزية]

رجل لكل العصور

فتى باريس نجد


يسعدني مروركم يا غالين

[ملكة عصرها]

فت فت انت اهنيا رح حل المثل
تقبل مروري

[king2007]

مشكور يافتى العوشوزيه....جهدك واضح جدا يالغالي...

ماتقصر يالغالي...

[فتى العوشزية]

يعطيكم العافيه على المرور

[صدى أحزاني]

مشكووووووور أخوووووي فتى العوشزيه


على الموضوع الاكثر من رائع وسلمت يدينك ويستهل التثبيت


تقبل مروري

أخوك:صدى أحزاني

[نمر]

به قامات كبيره ايضا لم تذكرها مثل شعراء العثيمين وشعراء السناني وعندك ابراهيم الدامغ و العبيدالله و (شاعر كفيف ما اعرف اسمه ) و نائب مدير مركز ابن صالح ( والله ما عرف اسمه ) ...
اتمنى ان تقدر نسوي ملخص لأغلب شعراء عنيزه .

تشكر على هذه اللمحه

[سواح]

يعطيك العافيه ع النقل الجميل والاكثر من رائع

[فتى العوشزية]

مشكووووووور أخوووووي فتى العوشزيه
على الموضوع الاكثر من رائع وسلمت يدينك ويستهل التثبيت
تقبل مروري
أخوك:صدى أحزاني

العفو

شاكر مرورك الكريم

به قامات كبيره ايضا لم تذكرها مثل شعراء العثيمين وشعراء السناني وعندك ابراهيم الدامغ و العبيدالله و (شاعر كفيف ما اعرف اسمه ) و نائب مدير مركز ابن صالح ( والله ما عرف اسمه ) ...
اتمنى ان تقدر نسوي ملخص لأغلب شعراء عنيزه .
تشكر على هذه اللمحه

أخوي أنا مالي معلومات كبيرة بالمجال هذا
وبالتأكيد عنيزة غنية بالكثير من الأدباء والشعراء الذين نفخر بهم
هنا على سبيل المثال لا الحصر

وأتمنى القيام بعمل كبير يضم جميع شعراء عنيزة
فلو كانت عندك المقدرة والمعلومة
فيا ليت


أشكر لك مرورك العطر

يعطيك العافيه ع النقل الجميل والاكثر من رائع
أشكر عزيزي على مرورك الكريم

[ابوصلاح]

يعطيك عافيه اخوي فتى العوشزية على العمل الرائع .
وأظن أن الأستاذ / روح التميمي تكلم عن شعراء عنيزة بشكل مطول وأعطى ترجمة جميلة جداً عن كل واحد منهم ، وهذا في منتدى ( مجلس عنيزة )

[فتى العوشزية]

ابو صلاح عنيزة

تستحق منا الكثير
فما نبذله لها ما هو إلا واجبنا

أشكر إطلالتك الرائعه
وأحيي الأستاذ روح التميمي